Pavitra Portal Recruitment Letest Updates - शिक्षक पदभरतीबाबत प्रसिद्धीपत्रक शंका समाधान संपर्क साठी अधिकृत ई-मेल

शंका समाधान -

दिनांक १५/०२/२०२४

• पवित्र पोर्टलमार्फत करण्यात येत असलेली शिक्षक पदभरती ही शासनाच्या प्रचलित तरतुदीनुसार करण्यात येत आहे. याबाबत मा. न्यायालयामध्ये दाखल विविध याचिकांमध्ये देखील पदभरती शासनाच्या प्रचलित धोरणानुसार असल्यामुळे ती सुरू ठेवण्याचे निर्देश दिले आहेत.

• पात्र अभियोग्यताधारकाने पवित्र पोर्टलवर मुलाखतीशिवाय व मुलाखतीसह अशा दोन प्रकारांपैकी कोणत्याही एका प्रकाराचे प्राधान्यक्रम लॉक केले असतील, तर उमेदवार पदभरतीसाठी त्या त्या लॉक केलेल्या प्राधान्यक्रमासाठी विचारात घेतला जाईल,

• काही अभियोग्यताधारक शिक्षक पदभरतीबाबत समाजमाध्यमातून वेगवेगळ्या प्रकारची चुकीची माहिती पसरवत आहेत, पात्र अभियोग्यताधारकांनी अशा चुकीच्या माहितीकडे दुर्लक्ष करावे. पवित्र पोर्टलवरील न्युज बुलेटिनच्या माध्यमातून पदभरतीबाबत योग्य ती माहिती प्रशासनाकडून देण्यात येत आहे.

• समाजमाध्यमावर (उदा., टेलीग्राम, व्हॉटसअॅप, युटयुब, इन्स्टाग्राम इत्यादी) चुकीची माहिती, स्वतःचे चुकीचे मत प्रदर्शित करुन पात्र अभियोग्यताधारकांमध्ये प्रक्षोभक/संभ्रम निर्माण/चिथावणी देणारे / उमेदवारांमध्ये नैराश्याची भावना निर्माण करणाऱ्या व त्यांचे समर्थन करणाऱ्याविरुद्ध पोलीस विभागास निगराणी ठेवण्याच्या सूचना देण्यात आलेल्या आहेत.

• पवित्र पोर्टलमार्फत होत असलेली शिक्षक पदभरती पारदर्शी पद्धतीने करण्यात येत आहे. सदरची पदभरती भविष्यात होऊ घातलेल्या सन २०२४ मधील लोकसभेच्या निवडणुकीपूर्वी करण्याचा प्रशासन कसोशीने प्रयत्न करीत आहे.

• काही अपरिहार्य कारणास्तव सदरची पदभरती लोकसभा निवडणुकीपूर्वी पूर्ण न झाल्यास प्रचलित कार्यपद्धतीनुसार ती पुढे पूर्ण करण्यात येईल, यास्तव पात्र अभियोग्यताधारकांनी याबाबत अनावश्यक चिंता करू नये.

• तथापि, शासन निर्णय दिनांक १०/११/२०२२ मध्ये नमूद केल्यानुसार शिक्षक पदभरती विविध टप्प्यांमध्ये होत आहे. सध्या दिनांक १६ ऑक्टोबर, २०२३ ते २२ जानेवारी, २०२४ या कालावधीमध्ये पोर्टलवर आलेल्या जाहिरातीची कार्यवाही करण्यात येत आहे,

• दुसऱ्या टण्यामध्ये येणाऱ्या जाहिरातींवरील कार्यवाही भविष्यात करण्यात येईल. यास्तव पहिल्या टप्यामध्ये ज्या उमेदवारांनी स्वप्रमाणपत्रामध्ये चुकीची माहिती नोंद केल्यामुळे / स्वप्रमाणपत्र अपूर्ण ठेवल्यामुळे/विहित मुदतीत स्वप्रमाणपत्र प्रमाणित न केल्यामुळे अशा विविध प्रकारच्या कारणांमुळे या सध्याच्या पदभरती प्रक्रियेत सहभागी होता येत नाही, अशा अभियोग्यताधारकांना नव्याने येणाऱ्या जाहिरातीच्या दुसऱ्या टण्यासाठी स्वप्रमाणपत्र पूर्ण/दुरुस्त करण्याची संधी दिली जाईल, याची संबंधित उमेदवारांनी नोंद घ्यावी.

• अभियोग्यताधारकांनी edupavitra2022@gmail.com या मदतकक्षाच्या ईमेलवर एकाच प्रकारचा मेल वारंवार अथवा एकाच विषयाचा ईमेल अनेक अभियोग्यताधारक करतात. यामुळे अभियोग्यताधारकांना योग्यवेळी मदत करता येत नाही. अभियोग्यताधारकांचे सर्वसाधारण मुद्दे असल्यास तसे कळवावे, जेणेकरून त्याचा न्युज बुलेटिनच्या माध्यमातून आवश्यक ती कार्यवाही करता येईल.

• स्वप्रमाणपत्र पूर्ण करण्याच्या कालावधीमध्ये तसेच प्राधान्यक्रम लॉक करण्याच्या कालावधीमध्ये मदतीची आवश्यकता असल्याने परिस्थितीनुरूप विविध समाजमाध्यमांवर आलेल्या संदेशास योग्य तो प्रतिसाद देण्यात आला आहे. तथापि, आता अधियोग्यताधारकांच्या स्तरावरील कार्यवाही पूर्ण झाल्यामुळे वैयक्तिक स्वरूपाचे संदेश पाठवू नयेत, अशा संदेशांची दखल घेतली जाणार नाही.