दिनांक 21 व 22 जानेवारी 2024 रोजी सर्वेक्षण प्रशिक्षण व 23 जानेवारीपासून सर्वेक्षणाची सुरुवात! महाराष्ट्र राज्य मागासवर्ग आयोग

pradipjadhao January 18, 2024

महाराष्ट्र राज्य मागासवर्ग आयोगाने प्रसिद्ध केलेल्या सूचनेनुसार मराठा समाजाचे मागासलेपण तपासणी सर्वेक्षणाबाबत पुढील प्रमाणे निर्देश दिले आहेत.

महाराष्ट्र शासनाकडील दि. १३ नोव्हेंबर २०२३ रोजीच्या पत्रान्वये मराठा समाजाचे मागासलेपण तपासण्याचे काम महाराष्ट्र राज्य मागासवर्ग आयोगाकडे सोपविले आहे. त्याअनुषंगाने राज्यातील मराठा समाज व खुल्या प्रवर्गाचे सर्वेक्षण शासकीय यंत्रणेमार्फत करण्यात येणार आहे. सदर सर्वेक्षणासाठी सॉफ़्टवेअर तयार करण्यात आले आहे. सदर सर्वेक्षणासाठी शासकीय यंत्रणेतील अधिकारी व कर्मचा-यांना प्रशिक्षण देण्याचे नियोजन पुढील प्रमाणे करण्यात आले आहे.

दि. २० जानेवारी २०२४ रोजी जिल्ह्याच्या व महानगरपालिका मुख्यालयाच्या ठिकाणी तालुक्याच्या व वॉर्डस्तरीय प्रशिक्षकांना सॉफ़्टवेअर वापरण्याबाबतचे प्रशिक्षण देण्यात येईल. हे वॉर्ड व तालुक्याचे प्रशिक्षक दि.२१ व २२ जानेवारी २०२४ रोजी संबंधीत तालुक्याच्या / वॉर्डच्या ठिकाणी तालुक्यातील / वॉर्डमधील सर्व नियुक्त कर्मचा-यांना प्रशिक्षण देतील व दि. २३ जानेवारी २०२४ पासून प्रत्यक्ष सर्वेक्षणाचे काम सुरु होईल. हे सर्वेक्षण दि. ३१ जानेवारी २०२४ पुर्वी पूर्ण करावयाचे आहे.

या कामकाजासाठी नियुक्त अधिकारी व कर्मचारी यांना आयोगामार्फ़त ओळखपत्र उपलब्ध करून देण्यात येणार आहेत.

(आ. उ.पाटील)

सदस्य सचिव

महाराष्ट्र राज्य मागासवर्ग आयोग